Urola Kostako Hitza

2008-06-17 | 14:28:07

Andres Bruño: "Maribel eta Blanca, lehenengo eta behin, estortsio saio baten biktima izan dira, eta bigarrenik, justiziarenak"

Ustez "ETAri laguntzeagatik" espetxeratu zituen Garzonek pasa den astean, eta haien aitak prentsaurrekoa eman du gaur eguerdian bere alaben alde

Andres Bruño, Maribel eta Blanca Bruñoren aitak, prentsaurrekoa eman du gaur eguerdian Orioko udaletxean, alaba baten eta enpresako abokatuaren babesarekin. "ETAri laguntzea" egotzita baldintzarik gabe espetxeratu zituen joan den astean Garzon epaileak, ustez "ETAri 'iraultza zerga' beren borondatez ordaintzeagatik". Bruñok bere alabak errugabeak direla adierazi du, eta nabarmendu nahi izan du "Blanca eta Maribel lehenengo eta behin estortsio saio baten biktima direla eta bigarrenik, justiziarenak".

• Andres Bruñok kaleratutako oharra, osorik

Ez du erantzunik

2008-06-13 | 14:44:03

Ikastolaren eraikin berriaren lehen harria jarri dute goizean

Ikastola osoa atera da lehen harria jartzera; ekainaren 25ean eraikin berria eraikitzen hastea espero dute

Ikasturte amaierako poza bikoiztu egin da gaur goizean; Ikastolaren eraikin berriaren aurreneko harria jarri dute Munto eremuan izango duten lursailean, eta bertan egon dira Ikastolako haur eta irakasle guztiak. Guraso asko bertaratu dira, eta Udaleko ezker abertzaleko zinegotzi Leire Zinkunegi eta Joseba Goiburu hautetsiak ere bertan izan dira; Zarauzko Oteitza institutuko ordezkariek ere ez dute ekitaldia galdu nahi izan. Dantzari batek egindako aurreskuarekin hasi da ekitaldia, eta ondoren maila bakoitzeko bina ikaslek eurentzat garrantzitsua den zerbait sartu dute lehen harri horretan. Ikastolako zuzendari Zigor Saizarrek adierazi duenez, ekainaren 25ean eraikitzen hastea espero dute, eta 2009ko irailerako eraikina prest egotea posible izan daitekeela gaineratu du.

Ez du erantzunik

2008-06-12 | 15:30:10

Garzonek Bruño ahizpak espetxeratzeko agindua eman du

Fiskaltzak baldintzarik gabe espetxeratzeko eskatu dio epaileari gaur goizean

Herenegun Orion Guardia Zibilak atxilotutako Maribel eta Blanca Bruño enpresaburuak espetxeratzeko agindua eman du Audientzia Nazionaleko Baltasar Garzon epaileak, Bruño ahizpek "ETAri lagundu izana" egotzita. Maiatzean Frantziako poliziak ustezko ETAko kide bati atzemandako paper batzuetan oinarritu du bere erabakia epaileak. Bere esanetan, paper horietan "Bruño ahizpek "ETAri emandako laguntza ekonomikoa eskertzen zuen ETAk". Garzonek adierazi duenez, horrek erakusten du enpresaburu hauek "beren borondatez ordaindu ziotela ETAri 'iraultza zerga'". 20:00etan elkarretaratzea egingo da plazan.

Erantzun 1

2008-06-12 | 13:49:44

'ORION! Sport Musik Festa' antolatu du Udalak uztailaren 4tik 6ra

Hainbat kirol modalitate, kontzertuak, jatetxe eta tabernak eta '40 Principales'-en festa egongo dira bertan, besteak beste

Eguerdian aurkeztu dute Donostian 'ORION! Sport Musik Festa'. Bertan izan da Orioko alkate Jon Redondo eta festa antolatzeaz arduratu diren Promueve enpresako kudeatzaile Jon Idiakez eta Get In enpresako kudeatzaile Jabier Ramon. Hirurek eman dute hiru egunetako festaren berri. Familia osoarentzako jarduerak antolatu dituztela azpimarratu dute, eta Redondok ekimen berriztailetzat jo du festa hau. Izar nagusia Nazioarteko WakeBoard Open-a izango dela adierazi dute, baina WakeSurf, Freestyle moto eta Skate erakusketak ere izango dira. Musikari dagokionez, Delorean eta No Way Out taldeak, DJak...etorriko dira eta haur parkea, jatetxe eta tabernen eremua eta erlajatzeko chill-out gunea izango ditu, besteak beste.

Ez du erantzunik

2008-06-12 | 12:47:16

Gaur ere elkarretaratzea deitu du Udaleko ezker abertzalearen taldeak

Guardia Zibilak herenegun gauean atxilotutako Bruño ahizpak aske gelditu ala ez, elkarretaratzea izango da 20:00etan

Herenegun gauean Guardia Zibilak Orion atxilotutako Maribel eta Blanca Bruño enpresaburuek gaur deklaratuko dute Espainiako Audientzia Nazionalean, Garzon epailearen aurrean. "ETAri 'iraultza zerga' beren borondatez ordaintzea" egotzi die Garzonek Bruño ahizpei. Udaleko ezker abertzaleak taldeak deituta, 100 lagun inguru bildu zen atzo iluntzeko elkarretaratzean, "Errepresiorik ez, Maribel eta Blanca askatu" lelopean, eta gaur ere elkarretaratzea egitea erabaki dute. Ahizpak libre gelditu ala ez, deialdiari eutsi egingo diotela adierazi dute antolatzaileek. 20:00etan elkartuko dira plazan.

Ez du erantzunik

2008-06-11 | 10:40:24

Bihar deklaratuko dute Garzonen aurrean Bruño ahizpek

Maria Isabel eta Blanca Rosa Bruño Azpiroz ahizpak Baltasar Garzon epailearen aginduz atxilotu dituzte, ustez "ETAri 'zerga iraultza' beren borondatez ordaintzeagatik"

Atzo gauean Guardia Zibilak Orion bizi diren Maria Isabel eta Blanca Rosa Bruño Azpiroz ahizpak atxilotu zituen herrian bertan. Aginagan eta Usurbilen marisko eta kontserba enpresak dituzte, eta bertara eraman dituzte goizaldera, enpresak miatzeko. 02:00ak aldera Aginagan dituzten bulegoetara eraman dituzte, eta handik Usurbilgo Zumartegi industrialdean duten haztegira. Azken miaketa hau goizaldeko 05:30ak aldera egin dute. Gero Madrilera (Espainia) eraman dituztela adierazi du enpresako kide batek. Espainiako Audientzia Nazionaleko epaile Baltasar Garzonen aginduz atxilotu dituzte, "ETAri 'iraultza zerga' beren borondatez ordaintzea" egotzita. Iturri polizialen arabera, Frantziako Poliziak duela gutxi Bordelen (Frantzia) atxilotutako Francisco Javier Lopez Peña ustezko ETAko buruzagiari aurkitutako agirien bidez izan dute bi enpresaburu horien berri.

• Zaragueta ikastetxeko irakasleen adierazpena
• Elkarretaratzea egingo dute gaur
• Getariako Iturzaeta Herri Eskolako irakasleak

3 erantzun

2008-06-02 | 13:02:11

Ikastolako Olaxka kantu taldeak 10 abestiz osatutako maketa kaleratu du

Igandean aurkeztuko dute Ikastolako jaialdian eta hainbat lekutan egongo da salgai 7 eurotan

Orioko Herri Ikastolako Olaxka kantu taldeak 10 abestiz osatutako maketa bat kaleratu berri du. Duela hiru urte sortu zen kantagintza, euskal kultura eta herri abestiak lantzeko helburuarekin. Esku-soinu jotzaile batek eta zortzi abeslarik osatzen dute taldea, eta 7 eurotan jarri dute salgai maketa Ikastolako idazkaritzan, Harkaitz eta Salatxo tabernetan eta Il Gelatto kafetegian. Igandean egingo dute maketaren aurkezpena Ikastolaren jaialdiaren baitan.

Ez du erantzunik

2008-05-26 | 11:37:12

Auzipetutako OKKko sei gazteak absolbitu egin ditu epaileak

Erasorik izan zenik ezin dela frogatu argudiatu du epaileak

Pasa den astean Donostiako Lurralde Epaitegiko epaileak absolbitu egin zituen OKKko sei gazte. Ustez bi udaltzain erasotzeagatik akusatuta zeuden, baina epaileak adierazi duenez, ez dago frogatzerik erasoa egon zen ala ez, eta horregatik absolbitu egin ditu. Martxoaren 4an udalbatzar baten ondoren udaltzainekin egondako ustezko istiluengatik akusatu zituzten OKKko zazpi gazte, horietako bat adingabea.

Erantzun 1