Urola Kostako Hitza

Oiana Blanco judoka oriotarrak Espainiako Liga irabazi zuen JC Usurbil taldearekin pasa den larunbatean, Madrilen (Espainia). Taldeak Ligan parte hartzen zuen aurreneko aldia zen eta euren garaipenak denak "ezustean" harrapatu dituela dio Blancok: "Domina lortu nahi genuen, baina geuk ere ez genuen uste irabaziko genuenik eta oso gustura gaude". JC Usurbil taldeko mutilek, berriz, seigarren postuarekin konformatu behar izan dute. Ibai Peña eta Xabier Urkizu oriotarrak aritu dira taldean, eta Peña gustura agertu da:"Dominaren bila hasi ginen lehian baina tartean lesioak ere izan dituzte taldekide garrantzitsuek eta azkenean lan txukuna egin dugula uste dut".