Urola Kostako Hitza

Orioko Udaleko Euskara Batzordeak beka bat emango du herriko hamar pertsona nagusiren hizkera grabatzeko. Herriko hizkera jasotzea da Euskara Batzordearen helburua: «Herriko hizkeraren berezitasun batzuk galtzen ari dira, azken urteetan asko aldatu delako batik bat haur eta gazteen kasuan», adierazi du Udaleko euskara teknikari Jabier Zabaletak. Herriko hizkera gehien gorde dutenak pertsona nagusiak direla uste du Zabaletak, eta beste hainbat herritan egiten ari diren bezala, Orion ere «altxor hori» jaso eta gorde nahi dela gaineratu du. Hizkuntza ez ezik, grabazio horiek etnografia ere bilduko dutela jakinarazi du Zabaletak: «Lehengo garaietako kontuak jasoko dira grabazioetan, gerra aurrekoak, gerra garaikoak...eta orduko bizimouaren testigantza ere bilduko da, beraz». Beka hau lortzeko interesa duenak maiatzaren 23a baino lehen egin beharko du eskabidea. Aurkeztu beharreko agiriak ere epe hori baino lehen eraman beharko ditu udal bulegoetara. Bekaren oinarriak www.oriora.com webgunean eskura daitezke. Bekadunak grabazioak egin eta han esandakoa transkribatu beharko du. Bekadunak bost hilabete izango ditu lana egiteko, eta ordainetan 2.000 euro jasoko ditu.