Urola Kostako Hitza

2008-07-05 | 10:51:55

'Orion! Sportmusikfesta', euriagatik bertan behera

Atzo jende ugari joan zen, baina gaur eguraldiak ez du lagundu

Hiru egunetan 15.000 lagun biltzea espero zuten 'Orion! Sportmusikfesta' antolatu dutenek, baina ekimena bertan behera gelditu da. Euria eta eguraldi txarra izan dira arrazoi nagusiak aurrera ez jarraitzeko eta astebururako aurreikusita zeuden ekitaldiak ez dituzte egingo. Ez dago atzerabueltarik, antolakuntzak hartu du erabakia eta ohar baten bidez jakinarazi dute. "Euriak azpiegituretan eragin dituen kalteak direla-eta" hartu dute erabakia, antolatzaileen arabera.

• Orioko alkate Jon Redondoren balorazioa (elkarrizketa osoa)

Erantzun 1

2008-07-04 | 16:53:42

Bruño ahizpei 20.000 euroko bermea jarri die Audientzia Nazionalak espetxetik irten ahal izateko

ETAri 'iraultza zerga' "beraien borondatez" ordaindu izana egozten die epaileak

Ekainaren 11n Maribel eta Blanca Bruño atxilotu zituzten Orion, ETAri 'iraultza zerga' "beraien borondatez" ordaintzea egotzita. Gaur goizean, Espainiako Audientzia Nazionaleko Baltasar Garzon epaileak 20.000 euroko bermea jarri die Bruño ahizpei, eta hori ordaintzen baldin badute irtengo dute espetxetik. Espainiako Estatuaren mugetatik irtetea debekatu die bi ahizpei eta epaitegira joan beharko dute astero. Ikerketa "oso aurreratuta" dagoela eta neurriek "ikerketa prozesua dagoen egoerara egokitu behar" dutela adierazi dute epaitegiko iturriek.

Ez du erantzunik

2008-07-03 | 14:09:17

Josefina Azkueren eta Maria Luisa Salegiren balkoiak sarituko ditu Udalak

Ingurumen eta Turismo Batzordeak laugarrenez antolatu du Orio Loretan saria; datorren astean egingo dute ekitaldi ofiziala

Eusko Gudari kaleko 14. eta 19. atarietako bigarren pisuetako balkoiak dira herriko ederrenak, Udalaren iritzian; bai behintzat lehiaketan parte hartu duten 19 herritarren balkoien artean. Lehenengo sariak, hortaz, Josefina Azkue Azpiroz eta Maria Luisa Salegirentzat izan dira. Bigarren sariak Maria Jesus Lizasok eta Begoña Zalduak eskuratu dituzte, eta hirugarrenak, azkenik, Ignacia Esnalek eta Maite Orbañanosek. Guztiek "gustu ona dute eta lan txukuna egin dute". Datorren astean emango ditu sariak Udalak, baina egun zehatzik ez du jakinarazi oraindik.

Ez du erantzunik

2008-07-02 | 19:12:20

Kultur eragileen batzordea sortzea adostu dute Kultura Batzordeak eta herriko eragileek

Herriko hainbat eragilek Udalari egindako zenbait eskaeretako bat zen hori; atzo iluntzeko bileran adostu zuten bi aldeek batzorde berria sortzea

Udaleko Kultura batzordeburu Noemi Ostolazak nahiz herriko hainbat eragiletako ordezkariek "positibotzat" jo dute atzo izandako bilera. Bertan kultur eragileen batzorde bat sortzea adostu zuten bi aldeek. Eragileek hainbat eskaera egin zizkioten Udalari: Kultur eragileen batzorde bat sortzea eta «erabakitzeko eskumena» izatea; eragileek kulturako «aurrekontuetan parte hartu ahal izatea»; eragileek formato ezberdinetan zabaltzen duten kaleko informzaioa «ez kentzea» Udalak; antolatzen diren ekimenetan «erraztasunak ematea»; gaztetxe bat martxan jarri bitartean ekitaldiak egiteko «leku egoki bat bermatze»a; Kosta tailerreko egoera «hobetzea» eta Kultur Etxeko erabileran «malgutasuna» egotea. Eragileen esanetan, Udalak oraindik ez die erantzunik eman eskakizun hauei eta horregatik "harrituta" agertu ziren. Dena dela, atzokoa "lehen pausua" dela eta "egiteko lan asko" dagoela azpimarratu dute guztiek.

Ez du erantzunik

2008-06-28 | 18:31:26

'Hiru lasterketa' kirol proban herritarrak garaile

Heldu! herri kirol taldeko kideei irabazi die 12 herritarreko taldeak

Gaur eguerdian 'Hiru lasterketa' kirol proba egin dute sanpedro jaien barruan, eta ikusmin handia eragin du herritarren artean. Heldu! herri kirol taldeko hiru kideek herritarren aurka lehiatu nahi zuten ergometroan, igerian eta korrika, eta azkenean herritarrak izan dira garaile. Aurrena ergometroko proba egin dute; lau herritarrek 20 metroko aldea atera diote Josu Larrarte aiarrari. Gero Eneko Larrañaga igerilaria neurtu da beste lau herritarren aurka, eta honek ere ez du irabaztea lortu. Azkenik, Hossain Kaanache korrikalariaren aurka aritu dira lasterka beste lau herritar. Guztira 30 segundoko aldea atera diote herritarrek kirolariei. Hala ere, giro onean amaitu dute proba, korrikako proban Kaanacheri itxoin diolako korrika egin zuen azken herritarrak, helmugan biak batera sar zitezen.

Ez du erantzunik

2008-06-25 | 17:19:52

2008ko aurrekontua 568.773 euroan handitu du Udalbatzak

Atzo egindako udalbatzarrean Bruño ahizpak "berehala askatzeko" eskatu zuen Udalak; gainera, Ikastolaren eraikin berria eraikitzen hastea ahalbideratu zuen Udalbatzak

Udalbatzar jendetsua egin zen atzo Orion. Hainbat gai garrantzitsu bozkatu zituen Udalbatzak: besteak beste aurtengo aurrekontua 568.773 euroan handitzea, Muntoko plan partzialari buruzko bi puntu eta Bruño ahizpak babesteko mozio bat. Hiru puntu nagusi hauek onartu zituzten. Ondorioz, ustez "ETAri laguntzeagatik" espetxeratuta dauden Bruño ahizpak "berehala askatzeko" eskatu zuen Udalbatzak. Muntoren inguruko puntuen artean kontzertazio hitzarmena onartu zutenez, Orioko Herri Ikastolak eraikin berria eraikitzen hasteko aukera du, hitzarmeneko klausula batek hala adierazten duelako. Bestalde, iazko aurrekontuan likidatu ez ziren partidetatik 568.773 euro aurtengo aurrekontura pasatzea erabaki zuen Udalbatzak.

Ez du erantzunik

2008-06-24 | 17:05:14

Bruño enpresaburuen egoera argitzeko eskatu du Eusko Jaurlaritzak

Garzon epaileari egin dio eskaera Miren Azkaratek, espetxe zigorra «ez dagoelako behar adina arrazoituta»

Eusko Jaurlaritzak Marisa eta Blanca Bruño enpresaburuen egoera argitzeko eskatu dio Audientzia Nazionaleko Garzon epaileari. Orioko bi ahizpa hauek baldintzarik gabe espetxeratuta daude duela bi astetik, ustez «ETAri iraultza zerga euren borondatez ordaintzeagatik».

Ez du erantzunik

2008-06-20 | 12:25:52

'Bisiguaren Festa Orio Estilora' jardunaldi gastronomikoa antolatu du Udalak uztailaren 18, 19 eta 20rako

Plazan bazkariak eta afariak egingo dituzte; Katxiña, Xixario eta Joxe Mari jatetxeetako kideek eta Oriogi okindegikoek hartu dute parte ekimenean

Atzo goizean aurkeztu zuten uztailaren 18, 19 eta 20an egingo den 'Bisiguaren Festa'. Orioko Udaleko Kultura batzordeburu Noemi Ostolazak aurkeztu zuen ekimena, eta berarekin izan ziren Orioko Kutxako zuzendari Amaia Biain, Oriogi okindegiko Jexux Alkorta, Katxiña jatetxeko Joxe Migel Zendoia eta Xixario jatetxeko Luis Mari Uranga. Hiru egun horietan bisigua protagonista izango den bazkari eta afariak egingo dituzte plazan, eta 40 euroko menuak dastatu ahal izango dituzte parte-hartzaileek. Horretaz gain, uztailaren 19an, larunbata, Orioko elkarte gastronomikoetako hainbat sukaldarik marmitako erraldoia egingo dute eta razio bakoitza euroan banatuko dute. Uztailaren 20an, igandean, berriz, Eusko Labeleko sukaldari batek hegaluzea erreko du parrillan eta razio bakoitza euroan erosi ahalko da. Gainera, asteburu osoan Euskal Herriko produktuen postuak egongo dira.

• Orioko postre berria: 'Bixigoxo'
• Egitaraua

Ez du erantzunik